NU-EI LE FA-EI TUANBIA

Hlan lioah nu le va an rak um i fapa pathum an ngeih hna. Upa bik kum 10 hrawng a si ah a nu nih a thihtak hna caah an pa nih nupi a hun țhi...

Hlan lioah nu le va an rak um i fapa pathum an ngeih hna. Upa bik kum 10 hrawng a si ah a nu nih a thihtak hna caah an pa nih nupi a hun țhit. A nupi nih cun a fa-ei le cu a huat tuk hna ah hin arpi hrang hi a taw le a hmaiah thichuak lak in ai huahter. Lo in a vapa a hung tlun tikah, “Na fale an țha lo, ka taw le ka hmai hna keu cikcek in an ka kheuh dih, na fale na thah hna lo ahcun ka kal lai” tiah an ih lioah a chimh. A nupi bia cu a zawn zau ve i a thinhun in a fale cu a auh hna hnuah an pathum in hai hmin kan lo lai tiah a kalpi hna. Hai kung cu an kai kho lo i hlei an donh. An kai dih in an pa nih hlei a phehkanh hna i inn ah a tlung.

A fale cu an khuaruah har in an țap lengmang. Cu tikah an nauhniang bik nih, ” Ka ule hi ti kan țah hi zeihmanh a țhahnem lo, țum khawhnak in kan i zuam lai” tiah a ti hna. A ule pahnih nih cun, “Zeitindah kan țum khawh lai, hai kung cungah thih ding lawng a si ko cang hi” tiah an țah a zual chinchin. Cu tikah an nauhniangpa nih, “Kan lupawng le kan biar kan poih lai, ka tai in kai khih lai i biar in duhsah tein nan ka thlak lai,” tiah a ti. An pehmi an lupawng le biar in an nauhiangpa cu a tai in an khih i an thlak hnuah hlei a hun donh. “Ka ule, nan thinphang hlah u, hai thei kha tampi in hun lo u law kan nu le kan pa kan phurh hna lai,” tiah a ti hna. “Thi hna seh a kan timi cu hai zong phurh awk an si lo” tiah a ule nih cun an ti. An nauhniang nih cun, “Sihmanhsehlaw, kan nu le kan pa cu kan lehrul hna lai lo, tam piin hun lo ko u” a ti hna. Hai cu tam ngaiin an phurh i an tlung. Hai cu an nu-ei nih cun a ei. Hai ei chawng ah cun a țha a nuam nain a hnuah cun, “Na fale hi na thah hna lo ahcun ka kal lai,” a ti țhan.

Tuhmui le paikawng an i phurh i hralawn cawh ah a kalpi hna. Hralawn an cawh dih hnuah, “Ka fale, hraliam khur hi a thuk maw, nan pathum in vung lut tuah u, a ti hna. An vung luh ah khin lungpher kaupi a chinh i vawlei a chilh dih hnuah hraliam cu a phurh i a tlung. An unau pathum in an țap lengmang i a hnu bik ah an nauhniang nih, “Ka ule kan țap lengmang hi san a tlai lo, kan chuah khawhnak tu ruah a hau; kan hrukpi in vawlei hi khorh hna u sih,” a ti i bahra khur tlang vawlei cu an hrukpi in an khoih an verh lengmang i nithum hnuah an chuak kho țhan. “Thi hna seh tiin kan tuah ko hmanh hna seh law hraliam bawm khat cio in kan cawh lai” tiah an nauhniangpa nih a ti i hraliam cu an cawh i paikawng khat cio in hrum lengmang in an phurh. An nu-ei cu bahra a um lio cu a or tha a nuam i țha ngai in a um. Hraliam a hung dih hnuah zan khat cu, “Hrangchia tang kho lopi, ka fale ka thah hna na ti, na thah țung hna lo; an ka vuaknak ah ka hmai le taw vialte thichuak dih le keu dih cikcek in a um; na thah hna lo a si ahcun ka kal lai” tiah a taw le a hmai cu a hmuhsak. A taw le a hmai cu a fah a celh naloin ai kheuhter hramhrammi a si. An pa nih cun thah taktak cu a ngamh lo i an thih khawh nakding zeidindah ka tuah lai tiah hngilh loin zan khuadei a ruat.

A fale cu a auh țhan hna i hreitlung pakhat cio a kenter hna. Ramlak ah far kung nganpi a hauter hna. Far kung cu tikuang ah kan saih lai a ti i an saih. A chin ah thingphel an tuah. An pa nih cun, “Vung lut u law, nan pathum nan i tlum khawh ahcun sanghra tampi ciah khawh a si lai, a ti caah an vunglut. Cu ahcun a chin i hri in fek tein a țem hnuah chengpalang hmun chia ah a hrilh.Kuang cu a vung ril lengmang i hmunrawn ah a tang. Sihmanhsehlaw unau pathum hna cu an thi lo. An chuak kho ti lo i, an țap lengmang. Mah lioah cun vate kuang cungah a hung kai thawng an hun theih. Ahodah kan cungah a ummi cu na si. Kan mah te hmanh kan thi lai maw, kan nung lai dah tiah khuaruahhar vansang- au in kan um ah,” tiah an ti. Cu tikah vate nih cun, “Hri țemmi kan chahpiak hna lai i, nan chuak lai ka ti pei a si ko, tiah nan hei duh lo le ka kal ko lai maw,” tiah a ti. Cu bia an hun theih ah cun, “Hrițem na kan chahpiak kan hngal lo i pei a si tiah, zaangfah tein hun chat dih ko,” tiah tha nuam ngai in an hun ti. Hri cu a chah dih in a zuang. An unau pathum in kuang chin thingphal cu an tha dih-umnak in an hun thawn i an chuak. “Kan nu le kan pa cu kan panh ngam ti hna lai lo; thingthei ramhnah hna hi kan ei ko lai,” an ti i buk an i sak, bahra an co, thingthei ram hnah an ei i an um.

Ni khat cu an buk hmai thingkung cungah thuro ai fut ko kha an hei hmuh. An nauhiangpa nih chai in tla ko a chaih. Thuro cok ah thaici phun tling an chuah. Lo an tuah i cu thlaici cu an tuh. Rawlkung cu țha tein an kheu dih i rawl tam ial an lak. Kum khat hnu kum khat in rawl cu an ngei deuhdeuh i kum thum hnuah cun ei cawk loin an ngei. Cu lioah cun paam a tlung i an umnak khua hna cu ei awk ngei loin an um. Mah hna rawl cu a pawng khuami hna nih an hun cawk hna i chawva le sia hna cu an in khat le an inntang khat in an ngei. An fang sukmi favai cu tilu nih a fenh i tiva kam cu faivai lawngte a khat.An nu-ei le an pa zong cu ei awk an ngei lo i an thi deng. A nupi nih, “Hnarchia tang pa, pur va phur,” tiah a ti. A vapa cu tiva i a fenhnak favai cu a zulh lengmang i a fale umnak a phan. Ka fale an si ti awk a hngal lo nain a fale nih cun an hngalh peng ko. Buh thaw le sa thaw an chumh. An sining kong an chim tikah an pa cu a lung a hung pem i ka fale ti a hngalh hna. A țap i a ngaihchiat le a ningzah a celh lo, a thi deng. Rawl cu sawngkhoi khat in an rawnh. Facang cawknak i ai kenmi hreitlung cu sawngkhoi cungah a hngalh lo karah a thli in an sanhpiak. An nu-ei caah buh le sa an fun i a chungah țhim an chiah.

An khua a vung phak i a thil a țhumh ah cun a nupi nih thil chuah cu a in ai nam i buhfun le hreitlung cu rianrang in a hun chuah. Cu tikah a vapa kepi cu hritlung nih tan ko a tlak i a thi. A vapa ruak hmanh zoh loin buhfun cu rianrang in a samh i a ei ai nam. Kaa hnih thum a hun i barh ah a hrom ah țhim nih a chunh i a thi ve.